ตจฺฉติ เอวเมว โข มหาราช โยคินา โยคาวจเรน ชินสาสเน อนุโลมยิตฺวา สีลปฐวิยํ
ปติฏฺฐหิตฺวา สทฺธาหตฺเถน ปญฺญาวาสึ คเหตฺวา กิเลสา ตจฺเฉตพฺพา ฯ อิทํ มหาราช
ตจฺฉกสฺส ปฐมงฺคํ คเหตพฺพํ ฯ ปุน จ ปรํ มหาราช ตจฺฉโฏ เผคฺคุํ อปหริตฺวา
สารํ อาทิยติ เอวเมว โข มหาราช โยคินา โยคาวจเรน สสฺสตุจฺเฉทํ ตํ ชีวํ ตํ สรีรํ
อญฺญํ ชีวํ อญฺญํ สรีรํ ตทุตฺตมํ อญฺญทุตฺตมํ อกตํ อภพฺพํ อปุริสการํ อพฺรหฺมจริยวาสํ
สตฺตวินาสํ อสนฺตํ สภาเว ว สตฺตานํ ตถาวสํ สงฺขารสสฺสตภาวํ โย กโรติ โส ปฏิสํเวทยติ
อญฺโญ กโรติ อญฺโญ ปฏิสํเวทยติ กมฺมผลทสฺสนา จ กิริยผลทิฏฺฐิ จ อิติ เอวรูปานิ
เจว อญฺญานิ จ วิวาทปถานิ อปเนตฺวา สงฺขารานํ สภาวํ ปรมสุญฺญตํ นิชฺชีวํ
วิคตฺตํ สตฺตอนุปลพฺภํ อนิจฺจํ สุญฺญตํ อาทิยิตพฺพํ ฯ อิทํ มหาราช ตจฺฉกสฺส ทุติยงฺคํ
คเหตพฺพํ ฯ ภาสิตํ เจตํ มหาราช ภควตา สุตฺตนิปาเต
กรณฺฑวํ นิทฺธมถ กสมฺพุํ อวกสฺสถ
ตโต ปลาเส วาเหถ อสฺสมเณ สมณมานิเน
นิทฺธมิตฺวาน ปาปิจฺเฉ ปาปอาจารโคจเร
สุทฺธา สุทฺเธหิ สํวาสํ กปฺปยฺวโห ปติสฺสตาติ ฯ

มกฺกฏวคฺโค ฉฏฺโฐ ฯ

ตสฺสุทฺทานํ
มกฺกโฏ ทารโก กุมฺโม ปวนํ รุกฺโข จ ปญฺจโม
เมโฆ มณิ มาควิโก พาฬิสี ตจฺฉเกน วาติ ฯ
ภนฺเต นาคเสน กุมฺภสฺส เอกงฺคํ คเหตพฺพนฺติ ยํ วเทสิ กตมนฺตํ
เอกงฺคนฺติ ฯ ยถา มหาราช กุมฺโภ นาม สมฺปุณฺโณ น สทฺทายติ เอวเมว โข มหาราช
โยคินา โยคาวจเรน อาคเม อธิคเม ปริยตฺติยา สามญฺญปารมึ ปตฺวา น สทฺทายิตพฺพํ
น เตน ลาเภน มาโน กรณีโย น ทปฺโป อุปฺปาเทตพฺโพ นิหตมาเนน นิหตทปฺเปน
ภวิตพฺพํ อุชุภูเตน อมุขเรน อวิกตฺถินา ฯ อิทํ มหาราช กุมฺภสฺส เอกงฺคํ